Ein Stueck Paradies auf Koh Phangan

Hallo Leute

Wi dir choeit gseh, hei mir die letschte 2 Wuche im Paradies glaebt =). Ueses Bungalow isch grad direkt naebem Meer gsi, so dass mir mit Meeresrusche hei doerfe ischlafe u erwache. Z Bungalow isch zwar raecht chli u rustikal gsi, aber aes het lengstens glaengt. Fuer dass dases Monsumzyt isch gsi, hei mr doch raecht schoens Waetter ga. Mir hei sehr viu Sunne choene tanke (was dr eint u dr ander vo oeich evtl. ou choent bruche), fuer uesi witeri Reis i Norde vo Thailand. Nach dr erste Wuche hei mr doch naer chli z Beduerfnis ga, d Insle chli z erkunde. Wie dir ja gseht het das unheimlech Spass gmacht u mir hei sehr viu vor Insle choene gseh, ou wenns ues a daem Tag doch ae chli verschiffet het =). Mir hei denn gmerkt, dass mr doch dr schoenst Strand vo dere Insle verwuetscht hei. Viu gits vor Insle Koh Phangan nueme z saege, usert dass mir ues wuerklech hei choene erhole us mit voue zueg gnosse hei. Uf dr Rueckreis hei mir no ae Umwaeg ueber Ranong gmacht, wo mir ueber d Graenze uf Myanmar hei muesse, damit mir ueses Visa fuer Thailand hei choene verlaengere. U nomau einisch meh simer mitemne Lokale Bus zrug uf Bangkok cho, diesmau het aber aus guet klappet =). Ufem Nachtboot vo Koh Phangan ufz Festland hei mr ae Englaender lehre kenne wie nr im Buiderbuech steit. Bsoffe u vou uf Paranoia... aer het ues Gschichtli verzeut wie dases ufem Nachtboot duet, wenns stuermisch isch u het ues zur Beruhigung aes paar Valiumtablette woue offeriere =). Si nid suber die Englaender!

Iz verbringe mir no ae gueti Wuche z Bangkok u erwarte mit froeid uesi Fruende Diana, Reto u Nicu! U bis denn verbringe mir no uesi Zyt mit de Franzose Betty u Alex, bis si ues de definitiv verloeh und ihri Waeutreis witerverfouge.

Suesch het sich bi ues nid viu gaenderet, usert dass mr brun si u am Dario sini Haar immer wie meh wachse. Mir hoffe euch geits gaeng no guet? Mir hei gseh, dass dir um die 7 - 13 Grad oebe heit, auso raecht chaut wuerdemer saege. Vergaesset nid d Winterpneus z montiere une guete Winterspaeck azfraesse hihihi!!!

Ae dicke Muntsch Sibylle u Dario